TXINBOTARRAK
Helbidea	Hermogenes Rojos 1, Auzo Etxea
Telefonoa	94 482 09 78
Faxa	--
Sorrera urtea	2.006
Bazkide kopurua	140
Txupinera	--
Auzoa	Zorrotza
e-mail	zorrotzakonpartsa@kaixo.com
web orrialdea	--

Janzkera:

Ezaugarriak: Txinbotarrak Zorrotzako Konpartsa auzo bilbotar honen konpartsa da eta bere helburua jai eta kultura herrikoi eta euskaldunak bultzatzea da, bai gure auzorako bai Bilborako ere.

Baldintza bakarra, Zorrotzakoa izatea edo Zorrotzan bizitza soziala egitea da. Auzokideon arteko harremana bultzatzea nahi dugu, bai elkarte desberdinen artean bai gizabanakoen artean, eta zergatik ez, belaunaldien artean ere bai. Hau da, auzoko bizitza dinamizatzea eta beronen subjektu aktiboak izatea, inplikatuz.

Era berean, hainbat ekintzetan parte hartzen dugu (edo parte hartuko dugu). Alde batetik, Bilboko Konpartsek antolaturiko Inauterietan, Konpartsero Egunean, Aste Nagusian, eta Santo Tomasen. Eta bestetik, gure auzoan Jai Batzordeak eta Taldeen Koordinakundeak antolaturiko Inauterietan, San Juanetan, Mikel Deunako Jaietan eta Olentzeron. Horrez gain, bestelako ekintzak antolatzen ditugu, hala nola aurtengoan Ibilaldira eta Araba Euskarazera eginiko txangoak, eta buruan ditugun beste batzuk gauzatzea espero dugu.

Oraindik jaioberriak garela esan daiteke. Alabaina, gure ilusioa eta ondo pasatzeko gogoak ikaragarri handiak dira. Beraz, konpartsan parte hartu nahi baduzu ez izan zalantzarik, bidali e-mail bat gure helbide elektronikora.

Historia: Nahiz eta iraganean hainbatetan azaldutako ideia izan, 2005eko Zorrotzako Jaiak arte (irailaren bukaeran eta urriaren hasiera inguruan) ez zen ganoraz planteiatu auzoan konpartsa bat eratzea. Jai eta kultura herrikoiak bai auzoan bai Bilbon bultzatzeko helburuarekin jaiotako proposamena da. Berehala, auzoko talde eta elkarte desberdinei komunikatzen zaie, horien artean bereziki Jai Batzordearekin elkarlanean jarduten direnei.

Jaiak bukatuta, lasaitasun handiagoz, auzokideak balizko konpartsan parte hartzeko prest egongo diren edo ez aztertzeari ekiten zaio. Jendearen erantzuna gustokoa bezain harrigarria da eta ilusioa eta gogoak nabarmentzen dira hasierako momentutik. Bereziki aipagarriak dira Gazte Asanblada, Gure Lurra eta Ibai-Arte taldeak, gure auzoan jai eta herri-kulturaren bultzatzaile nagusiak direnak, zeinen partaideek dena ematen duten proposamena ezagutu bezain laster.

Auzoan izandako harrera onagatik eta behin jendearen asmoak jasota, Txinbotarrak Zorrotzako Konpartsa sortzea erabakitzen da. Izena txinbotik datorkio, gure auzoan ezaugarri ziren kanaberadietako txoritxoa, alegia. Egun, konpartsak 140 kide inguru ditu baina zifra handituz doa apurka-apurka.

Behin Bilboko Konpartsen federazioan onartuta, gure aurreneko erronkari gogoz egiten diogu aurre: 2006ko Inauteriak. Hain handia da gure inplikazio-maila ezen Bilboko konpartsen artean bakarrak baikara federazioak antolaturiko ekintza guztietan parte hartzen, sariak ere jasotzeraino: koplilletan hirugarrenak (hiru partaide ginela esan beharra dago) eta putxeretan bostgarrenak.

Orain dela gutxi, Konpartsero Egunean parte hartu dugu, agerraldi nabarmena egin ere, bai lagun kopuruen aldetik bai sortutako giroaren aldetik. Momentu honetan, ilusioz beterik gaude gure lehenengo Aste Nagusia noiz helduko zain, berton ikaragarri pasatzeko eta beste konpartsetako kideak ezagutu eta anaitasunean aritzeko asmoa baitugu.